Cum ex pietatis officio dei ministris intendamus favores nostre benignitatis extendere, laudabilius noscitur viris religiosis nostra cura provisionis impendi, qui tanto debent a secularibus esse curis exempti, quanto magis expedit, ut orationes eorum, quas pro salute cristianitatis impendunt, a molestiis non debeant nec infestis casibus perturbari. Ex his enim sacris operibus actus nostros feliciter decoramus, si religiosis divinis obsequiis intendentibus ad nos tamquam ad unicum et singulare refugium concurrentibus mansuetudinis nostre gremium reseremus et iustis eorum supplicationibus aures nostrum culmen benevolas non avertat.