Quia intelleximus quod tecta domorum castri nostri
Lacuspensilis
recohoperiri indigent et beneplaciti nostri est quod aqua, que olim duci et derivari consuevit in pede eiusdem castri,
ibidem duci et derivari debeat, ut ex derivatione huiusmodi in loco ipso solito in quo coadunari consuevit pro usu hospitii
nostri et equitaturarum curie nostre. Aqua ad sufficientiam habeatur, fidelitati tue sub pena centum unciarum auri firmiter
et expresse precipimus quatenus, facta diligenti et sollempni extimatione per magistros et alios viros fideles et ydoneos
expertos in talibus in testimonio puplico sciente et presente castellano eiusdem castri pro quanta quantitate pecunie,
tecta ipsa recohoperiri et aqua predicta, ad predictum locum, in pede videlicet ipsius castri duci et derivari poterit,
factisque de extimatione ipsa tribus scriptis puplicis consimilibus, continentibus formam presentium, nomina et cognomina
extimatorum et quantitatem pecunie pro qua tecta ipsa recohoperiri poterunt et quantitatem etiam pecunie pro qua aqua ipsa
ad predictum locum duci et derivari poterit, quorum uno tibi retento alio eidem castellano dimisso, tertium magistris
rationalibus magne curie nostre sine mora transmictas. Tecta ipsa in hiis in quibus reparari indigent, presente et
sciente castellano predicto decenter et bene recohoperiri facias sine mora nichilominus aquam predictam, sicut extitit
hactenus consuetum, per aqueductus per quos derivabatur hactenus duci et derivari facias usque ad pedem dicti castri,
ad locum videlicet in quo coadunari consuevit, ut superius est expressum, ut pro usu hospitii nostri et equitaturarum
curie nostre ibi aqua sufficiens habeatur, de quacumque fiscali pecunia et in defectu alterius pecunie curie de pecunia
presentis generalis subventionis in tua iurisditione imposite, que est etc. non obstante etc. Ita tamen quod omnes expense
que fient pro recohoperiendis tectis predictis et derivanda et ducenda aqua ipsa ad locum predictum fiant presente
et sciente castellano predicto, et nichil inde conscientiam suam lateat, et de expensis ipsis omnibus sicut fient de
die in diem fiant duo quaterni consimiles, continentes quantitatem pecunie, que
soluta fuerit quibuscumque, nomina recipientium et pro quibus rebus et servitiis et diem
et locum solutionis particulariter et distincte. Unus videlicet per te vel statuendum
loco tui, de quo tanquam de teipso confidas, cum non sibi set tibi exinde innitamur
sigillandus sigillo dicti castellani et alius per eundem castellanum sigillandus tuo
in tue rationis tempore de utroque quaterno debita collatio fieri possit. Nichilominus
de omnibus que pro predictis solveris recipias ad tui cautelam ydoneas apodixas per te
in tuo ratiocinio producendas cautus existens quod tam in extimatione predicta quam
in expensis que fient pro predictis tectis recohoperiendis et ducenda et derivanda
aqua predicta curiam nostram circumveniri vel decipi in aliquo non contingat.
Et si forte non habeantur
tot conducti plumbei per quos aqua ipsa duci valeat usque ad pedem ipsius castri, ducatur et derivetur usque ad
locum illum ubi huiusmodi conducti plumbei deficiunt, et etiam in antea quantumcumque plus per planitiem usque
ad summitatem ipsius castri et ibi coadunetur ut ad opus hospitii nostri et equorum curie nostrae ut dictum est
aqua sufficiens habeatur