Cum
Iohannes de Cauda
habitator
Potencie
olim custos
foreste
Lacuspensulis
et
heredes quondam
Rogerii de Aresio
dudum custodis
foreste
sancti Gervasii
teneantur et debeant de proventibus forestarum ipsarum debitam ponere nostre
curie racionem, fidelitati tue sub pena unciarum auri decem districte iubemus,
quatenus statim receptis presentibus unicuique ipsorum sub pena unciarum auri
viginti ex parte nostre maiestatis iniungas ut per totum ultimum diem presentis
mensis septembris ad tardius cum quaternis cautelis et scriptis omnibus ac
residuo toto in pecunia que exinde habent et habere debent in nostra curia
se presentent posituri inde primo in camera nostra summarie ac successive
coram magistris racionalibus magne curie nostre finalem et debitam racionem
ac satisfacturi eidem curie de toto eo in quo per racionem eandem apparuerint
debitores. Et nisi de presentacione eorum ad premissa infra dies decem dictum
terminum immediate sequentes tibi constiterit per nostram licteras responsales
tu statim nullo a nobis proinde alio expectato mandato pecuniam dicte pene de
bonis ipsorum que habent in iurisdictione tua pro nostra curia exigas ab eisdem
et exactam ad cameram nostram mictas nostris thesaurariis assignandam,
significaturus nobis per licteras tuas formam presencium continentes
diem iniunctionis tue cum pene impositione et quicquid inde duxeris
faciendum.