Robertus etc. Guillelmo de Ebulo militis iustitiario Basilicate fideli suo etc.

Intellecto nuper quod castellani Gervasii et Lacuspensulis minus prudenter et potius insolenter agentes animalia massariarum nostrarum non permittunt sumere pascua in forestis commissis custodie eorumdem, animalia privatorum indifferenter in illis recipiunt et affidant in preiudicium nostre curie manifestum, et quod est satis enorme de aqua fontis Sancti Gervasii , quam castellanus dicti castri vendit pro animalibus privatorum, animalia dictarum massariarum sumere et habere non possunt, nos exinde contra dictos castellanos non indigne turbati mandamus eis per alias litteras nostras expresse quod animalia massariarum ipsarum mercata merco curie in forestis eisdem sumere pascua et aquam in locis videlicet consuetis libere et sine contradictione permittant, et animalia privatorum in eis recipere vel affidare nullo modo presumant, tue quoque fidelitati committimus et expresse precipimus quatenus si dicti castellani a talibus de cetero non desistent tu eos ad id auctoritate presentium qua expedierit coercione compellas, et nichilominus quia nolumus ipsos impune de premissis transire subiungendo mandamus ut de predictis omnibus inquirere studeas diligenter, et si rem inveneris ita esse contra castellanos ipsos ad penam procedas meritam de commissis.

Datum Neapoli anno domini MCCCXV die V octobris XIIII indictionis. Regnorum nostrorum anno septimo.