Scriptum est nobili viro
Iohanni de Monteforti
Squillacii
et
Montis Caveosi
comiti, regni
Sicilie
camerario,
dilecto consiliario familiari et fideli suo etc. Strenuitatis tue meritis
grandem de te fiduciam obtinentes custodiam palatii et defensarum
nostrarum
Lacuspensilis
et
cum eis procurationem casalis Montis Marconis defensis ipsis anexi, amoto inde quolibet alio,
tibi durimus usque ad nostrum beneplacitum committendam, fidelitati tue mandantes quatenus
palatium defensas et casale predicta statim ad manus tuas recipiens illa cum debita diligentia
custodiri facias, et pro parte nostre curie procurari, servaturus et servari facturus tenaciter
constitutiones clare memorie domini patris nostri et nostras editas super custodia forestarum.
Et ecce custodi palatii et forestarum ipsarum damus per alias nostras litteras in mandatis,
ut a custodia ipsa desistens dictam palatium cum armis victualibus munitionibus et aliis rebus
curie ibidem sistentibus tibi vel nuncio tuo debeat assignare tam palatium ipsum quam defensas
ipsas, tue deinceps vel statutorum tuorum custodie relicturus custodiendas et procurandas cum
casali predicto per te vel statutos eosdem usque ad nostrum beneplacitum supradictum.