Federico II ordina a un ufficiale, su richiesta degli abitanti del castello …, di far sì che i podestà del castello stesso non chiedano stipendi più alti di quelli pagati al tempo della nomina di Pandolfo di Fasanella a vicario generale in Tuscia, o al tempo in cui il castello stesso è passato alla fedeltà all’imperatore.
De salariis Potestatum in approbata forma.
1. Pro parte uniuersitatis castri..., fidelium nostrorum, nuper celsitudini nostrae fuit oblata querela, quod cum ipsi antiquitus eorum Potestatibus certam et congruam pecuniae quantitatem pro salario, et non ultra, secundum formam Statuti castri eiusdem consueuerint exhibere. 2. Dubitantes, ne in futurum per alios Potestates maiorem compellantur soluere pecuniae quantitatem, maiestatis nostrae pro parte ipsorum extitit humiliter supplicatum, ut eisdem fidelibus nostris super hoc ad futuram cautelam ipsorum dignaremur misericorditer prouidere. 3. Nos itaque ipsorum supplicationibus benignius inclinati, fidelitati tuae precipiendo mandamus, quatenus Potestates eorum, ibidem de cetero per nostram curiam destinandos uel statuendos, illa salarii quantitate facias esse contentos, quam Potestati eorum ipsos tibi constiterit exoluisse eo anno, quo de Lombardiae partibus redeuntes per Tusciam transiuimus, et Pandulphum de Fasanella, proditorem nostrum, uicarium Imperii in Tuscia duximus ordinandum; uel anno, quo terra ipsa ad nostram fidelitatem dicitur deuenisse.