1. Missos nuper ad presentiam nostram prouidos uiros uniuersitatis uestrae
legatos gratanter recepimus, hylariter uidimus et propositionis eorum
uerba pleno collegimus intellectu. 2. Quorum industria diligens et intercessio
studiosa recte ipsos tantae urbis nuntios fatebatur, dum, ostendentes altam
mittentium uerbo et opere dignitatem, coram nobis suae legationis officium
prudenter et fideliter impleuerunt.
3. Cumque tam ex ipsorum relatibus, quam ex ipsa experientia rerum,
quae quorumlibet testium depositioni preponitur, firmiter serenitas nostra
comperit, quod purum geritis erga nos sinceritatis affectum et honor noster
in
Vrbe
continuis semper et fructuosis successibus procuratur, certos esse uos
uolumus, quod sic nos delectat generalitatis et singularitatis uestrae promouere
compendia, sic stabili mente concepimus statum uestrum ubilibet ampliare,
ut, uobis ipsis retinere credentes, quicquid in uos honoris et commodi dextera
nostrae liberalitatis extendet uel effundet, uoluntatem, quam erga nos placidam
semper habere uos nouimus, gratis iugiter inductionibus augeamus.
4. Vos igitur, uiri fortes et nobiles, in quos uires et animos grata proauorum
generositas propagauit, de potentiae nostrae felicitate confidite et
honorem nostrum, qui uester est, clarorum operum effectibus promouete,
ut uoluntates nostrae mutuis concretae profectibus, sic in nobis uestrorum
actuum claritate tripudient, quod in uobis de nostrae munificentiae generositate
florescant.