Ep. III 15 (Tanta est bonae fidei et deuotionis...) Petrus de Vinea Martina Pavoni mark-up by transcription by Martina Pavoni main editor Fulvio Delle Donne BUP - Basilicata University Press Potenza 2026 Attribution-NonCommercial-ShareAlike 4.0 International (CC BY-NC-SA 4.0) L'epistolario di Pier della Vigna, coord. di E. D'Angelo, ed. crit. a cura di A. Boccia, E. D’Angelo, T. De Angelis, F. Delle Donne, R. Gamberini, Soveria Mannelli 2014, p. 502 Par. lat. 8563, f. 49r, M, Pa, Pr, V PdV III 15

Federico II chiede al re di Cipro di ospitare presso la sua corte frate Elia d’ Assisi , suo consigliere e incaricato di una missione diplomatica per suo conto.

fine 1243?

Regi Cipri , recommendatio fratris Heliae .

1. Tanta est bonae fidei et deuotionis probatae constantia tantaque laudabilium efficacia meritorum, quam in prouido uiro fratre Helia , dilecto familiari et fideli nostro, semper et utiliter inuenisse meminimus, quod ipsum iam a fructibus cognoscentes, personam suam domesticam nostris seruitiis libenter adicimus et suae circumspectionis consiliis fiducialiter inheremus. 2. Cum igitur eumdem fratrem nuper ad partes Transmarinas ad presentiam nostram transfretare paratum, pro quibusdam arduis excellentiae nostrae negotiis, in quorum executione personam eius utilem et necessariam fore censuimus, a transitu ipso, preter suae uoluntatis propositum, prouiderimus retrahendum et ipsum, licet inuitum, quodammodo in curia uestra propterea mandauerimus aliquamdiu moraturum. 3. Affinitatem uestram requirimus et rogamus attente, mandantes, quatenus negotia predicti fratris in partibus ipsis habere uelitis sic efficaciter et utiliter commendata, ut, dum idem sub protectione nostra consistit, eiusdem negotia continua et uotiua suscipiant incrementa, nosque uobis propterea, qui gratiam dicto fratri faciendam super hoc nobis ascribimus, diligentius obligetis ad grates, et fratrem eumdem, qui famae uestrae uulgaris relator existit, deuotiorem faciatis ad uestra seruitia de deuoto.