Ep. II 52 (Super eo quod de fortunatis auspiciis...) Petrus de Vines Martina Pavoni transcription by mark-up by Martina Pavoni main editor Fulvio Delle Donne BUP - Basilicata University Press Potenza 2026 Attribution-NonCommercial-ShareAlike 4.0 International (CC BY-NC-SA 4.0) L'epistolario di Pier della Vigna, coord. di E. D'Angelo, ed. crit. a cura di A. Boccia, E. D’Angelo, T. De Angelis, F. Delle Donne, R. Gamberini, Soveria Mannelli 2014, pp. 415-6 Par. lat. 8563, f. 39v PdV II 52

Federico II invita un nobile suo suddito a festeggiare la sua vittoria contro i congiurati, uccisi con la presa del castello di Capaccio, grazie all’intervento dei fedeli del Regno, e l’imminente ripresa della campagna militare in Italia , resa più spedita dal successo recentemente ottenuto contro Perugini e Assisiati.

1246

Item significat cuidam nobili fideli suo, petenti certificari de prosperis successibus suis.

1. Super eo quod de fortunatis auspiciis et felicibus processibus nostris per nostras recreari litteras suppliciter postulasti, uolentes exinde uotis tuis libenter annuere, fidelitati tuae presentium tenore intimamus, quod, diuina dextera nostris assistente processibus, feliciter uiuimus et magnifice triumphamus, ac nonnullis ex proditoribus nostris, qui, sicut famae preloquio et relatione ueridica credimus ad tuam notitiam iam deductum, nefando proposito in necem nostram ausu temerario conspirarant, pro merito penae supplicio traditis et ignominiosa morte dampnatis, reliqui, qui sub defensionis, quin potius offensionis eorum ymagine, metu terribili, uelut de celo fulminis ictu percussi, se in castro nostro Capacii receptarunt, sic fidelium nostrorum Regni clara deuotione sunt undique circumsepti, sic continuo machinarum nostrarum ictibus incessanter afflicti, cisternis et domibus diruptis, propugnaculis omnibus murorum et turrium deuastatis, ut, tamquam undique coartati et manus nostras effugere non ualentes, ab ultionis instantis et indubitatae iudicio sola se ualeant spontanea gladii morte subducere, uel excelsae rupis ex parte maritimae precipitio liberare. 2. Et sic Regni nostri negotiis iam pro uoto dispositis, ad rebellium nostrorum et Imperii reliquias conterendas, Ytaliae partes in proximo uictoriose repetere feliciter et instanter accingimur, cum ad id et uoluntatis nostrae nos auiditas inuitet, et de Perusinis ac Asisinatibus rebellibus nostris nuper obtenta uictoria reddat libere expeditos. 3. Tu igitur, qui tamquam uas puritatis et aromatum cella precipua, per fidem et deuotionem tuam uniuersis redolens per exempla, quem nec seditiosa seductio uariauit, nec laborum commouit immensitas, nec demum larga promissio potuit a nostri professione nominis, in qua te natiua solidauit. antiquitas immutare, singulorum mentes sollicita, et huiusmodi nostrae festiuitatis ferias ac aduentus nostri uigilias, una cum ceteris nostris fidelibus ipsarum partium hylariter sollempniza.