Karolus etc. Potestati, Capitaneo, Ancianis, Consilio et Communi Pisano , dilectis amicis suis salutem etc.

Nuper enim Nicolaus Maletta , quem proditorem nostrum minime ignoratis, paratis in terra vestra et cum vestro favore galionis duobus, eis Theotonicis militibus comunitis, intendebat cum illis nec non et cum uno alio, quem preparaverat in Plumbino, quod est de vestro districtu, versus Calabriam et Siciliam in favorem Frederici Lancee aliorumque nostrorum rebellium proficisci; propter quod Nos, ne libere possent in offensionem nostram procedere, armavimus easque fecimus non sine sumptibus necessariis comuniri. Boos vero de Sancto Pagano et Gerardus de Sanciano , milites familiares nostri et de hospitio nostro proprio, post multas eis in portu vestro et per vestros irrogatas iniurias, in quinquaginta libris turonensium dampnificati fuerint. Et infestum videtur esse quibusdam vestris concivibus inspicere etiam signa nostra, dum quidam civis Gaietanus fidelis noster signis nostris sua vellet insignire vexilla, illaque apud Pisas faceret preparari, fuerunt non sine nominis nostri contumelia de preparatorum eiecta manibus, scissa in frustra et pedibus conculcata. - Galionum etiam, in quo Robertus de Baro etc. suam ad Regnum reduci faciebat uxorem, nec signum quidem nostrum est elevare permissum, vestris mercatoribus in quodam galiono de Plumbino id prohibentibus, et proponentibus illis de galiono dicti Roberti prelium si contrarium attemptarent.

Poncius insuper de Villanova et frater Gastonus de Pistilat ac Raymondus Cantelmi , nuncii nostri de Provincia venientes, apud Plumbinum fuerunt graviter verberati. - Nec relinquimus sub silentio quam imprudenter contra Nos et honorem nostrum nonnulli de vestris concivibus, etiam in Regno nostro morantibus, linguam laxant, famam nostram suis oblocutionibus puplice impetere non verentes. Nos igitur, licet hec ex comuni omnium vestrum consensu ac voluntate procedere non credimus..., universitatem vestram actente requirimus... quatenus infra kalendas februarii proximo venturas pro omnibus de premissis iniuriis... satisfactionem et emendam condignam... Nobis impertiri studeatis. Quod si hec infra terminum ipsum nolueritis adimplere, omnes concives et mercatores vestros, qui in Regno Sicilie ac Provincia aliisque terris nostris morantur, infra kalendas subsequentis mensis marcii de terris ipsis protinus revocetis, quoniam ex tunc nulla ipsos volumus in eisdem terris libertate vel immunitate aut securitate gaudere...

Datum Neapoli, XXVI octobris, X ind., Regni n. a. II.